Share

Pin It

 

 Karo talash koi noor ki nishani ab,
NahiN qubool andheroN ki hukmarani ab !!

YahaN sipaah bhi dushman, wazeer bhi ghaddar
So chhoRay jatay haiN ham, apni rajdhani ab!

Qaseeda-go nay meray Qissa-go khareed li'ay
KahaN suhana'ey ga koi meri kahani ab?

JinheN gumaN hai, woh kehtay raheN, ''sab achha hai''
Yaqeen waloN nay lekin teri na mani ab !!

Phir is kay baad dhuwaN hi bachay ga aahoN ka
Keh sookhnay ko hai, aankhoN ka sara pani ab

ZamiN peh phelay azaboN kay log aadi haiN
Yeh mangtay haiN bala koi aasmani ab !!!