Share

Pin It

Be-aitebaar shakhs tha so waar kar gaya

Lakin merey shawoor ko baidaar kar gaya

Kuch mein ne Ishiteial mein shikwey giley kiye

kuch wo shikayatain sar-e-bazar kar gaya

Pehley woh meri zaat ki taameer mein raha
phir mujh ko apney haath sey mesmaar kar gaya

woh aa mila to faasley kat~tey chaley gaye
bichrda to raastey merey dushwar kar gaya

Share

Pin It

Kabhi fursat main aao to meri ek nazm se milna

Magar iss nazm ka dhaaga

Tumhaari yaad ka lehja badalte hi na jaane kyun ulajh kar TooT jata hai

Tabhi to iss ki satrain ja ba ja bikhri huwi hain

Koi takye ki shiknon main, buhat TooTi huwi neendon ki ankhon main pari hai

Koi dehleez par ahaT ki baali kaan me daalay khari hai

Koi rukhsaar pay aansoo ki soorat jum gayi hai

Koi dil se labon tak aate aate tham gayi hai

Koi bookshelf main bechain haatho se uTha kar bin parhay rakhi kitabon me pari hai

Koi ehsaas ki ankhon main kankar ki tarah atki hui hai

Koi uss adh jaley cigarette main lipti reh gayi hai

Jisse jaane ki jaldi main piye bin ash tray main tum ne chorra tha

Ziyan ki dhool ban kar paon se lipti hain kuch satrein

Kahin ek satr ke andar shikasta maan se bheegi huwi palkein pari hain

Kahin ek satr main wo chaand atka hai

Meray kamre ki khiRki se jisse tum dekh kar sheeshe se uljha choR aaye thay

Koi ek satr uss chaaye ki pyaali main pari ho gi

Piye jaane ke khaahish main jo table par hi rakhi reh gayi thi

Kahin ek satr me khaabon ka wo rasta bhi rakha hai

Main jiss par apni aankhein bhool aayi hoon

Kahin ek satr ke andar meri wo saans rakhi hai

Tumhaari be nishan masroofiyat ke bojh se jiss ko main ab tak ji nahi paayi

Koi ek satr shayed Daakiye ki cycle ki chain me uljhi huwi hai

Tumhaara khat liye bin iss saRak par kyun wo aata hai ???

Zara sa ghor se sun'na

Receiver me tumhaare phone k shayed meri awaz rakhi ho

Issay ab parcel kar do to main iss se bhi kuch bheegi huwi satrain bana loon gi

Abhi dil ki hathaili par bhi kuch satrein pari hain

Buhat nazuk hain , lafzon se chhuwa to TooT jaein gi

Koi in muntazir ankhon main rakhi hai

Jinhe tum apna keh kar bhool jaatay ho

Yahin ek satr ki ankhon main mera khaab rakha tha

Tumhaari berukhi ke paon se kuchla para hai

Mere iss khaab ka tawan kya do gay??

Suno!

Iss nazm ko unwaan kya do gay??